Avioni zjarrfikës “Air Tractor AT-833”, i cili prej së martës është angazhuar në operacionet për shuarjen e zjarreve në Mallakastër, është rikthyer edhe sot për të vijuar ndërhyrjen në zonat e prekura nga flakët.
Burime bëjnë me dije se avioni i përket kompanisë me të cilën qeveria shqiptare ka nënshkruar kontratën për blerjen e tre avionëve të këtij modeli, të cilët pritet t’i bashkohen Forcës Ajrore shqiptare në fund të këtij viti.
Sipas të njëjtave burime, avioni i parë do të pasohet nga një i dytë në ditët në vijim. Fillimisht, mjetet ajrore do të shërbejnë për trajnimin e pilotëve shqiptarë në përdorimin e tyre, por për shkak të situatës me zjarret, stërvitja po zhvillohet në kushte reale, gjatë operacioneve të fikjes së flakëve.
Aktualisht, avioni operohet nga pilotët e kompanisë, ndërsa në fazat e ardhshme në misione do të përfshihen edhe pilotët shqiptarë, të cilët do të fitojnë përvojë praktike në ndërhyrjet ajrore kundër zjarreve.
Në mbështetje të operacioneve është përdorur gjerësisht edhe droni Bayraktar, i cili ka ndihmuar në identifikimin e hershëm të vatrave të zjarrit dhe monitorimin e situatës në terren. Gjithashtu, në operacionet e fikjes janë angazhuar edhe katër helikopterë të Forcës Ajrore, të cilët po vijojnë ndërhyrjet në zonat më problematike.
/vizionplus.tv
