Online qarkullojnë disa skema mashtrimi, të cilat përdorin të dhënat personale dhe bankare për të kryer veprime në internet. Dikush përdor emrin apo markën e një tregtari të njohur dhe josh përdoruesit me një ofertë. Në raste të tjera, qytetarët mashtrohen edhe nga mesazhe që tregojnë se për ta ka një pako, por duhet të saktësojnë të dhënat për ta marrë atë.
“Për fat të keq, ka pasur edhe individë që kanë rënë pre e mashtrimit. Nëse ndjek linqet e sugjeruara, ato kërkojnë të dhëna personale dhe të dhëna sigurie, si kode, PIN, si në një rast të vërtetë, por që paratë shkojnë në llogaritë e tyre sepse lidhja është në një faqe të rremë. Transaksioni ndodh një skemë mashtrimi duke i dërguar fondet në llogaritë e kontrolluara nga mashtruesi. Në rast të mashtrimit, të vidhen të dhënat personale dhe ato të kartës bankare”, tha Spiro Brumbulli, nga Shoqata Shqiptare e Bankave.
Për të mos u mashtruar, qytetarët nuk duhet t’i ndajnë të dhënat e tyre bankare me të tjerë.
“Fshini çdo mesazh apo email të ardhur nga një burim i panjohur që ju kërkon të kryeni veprime në linqe të cituara. Mos tregoni asnjë kuriozitet për të provuar se çfarë mund të jenë këto njoftime joshëse. Në asnjë rast, banka nuk do t’ju kërkojë të dhënat personale bankare. Nëse ju kërkohen këto të dhëna përmes mesazheve apo telefonatave, me shumë mundësi është një përpjekje për mashtrim”, tha Brumbulli.
Në rastet kur dikush është mashtruar, ai duhet të kontaktojë menjëherë me bankën për të ndryshuar kartën dhe elementët e tjerë të sigurisë./vizionplus.tv
