Virusi i Nilit, 12 raste dhe 3 vdekje për një javë në Greqi

Gjatë javës së kaluar në Greqi, sipas raportit epidemiologjik të EODY  janë raportuar 12 raste të reja me virusin e Nilit Perëndimor si edhe  3 vdekje.

Janë regjistruar edhe katër raste të importuara të infeksionit në pacientë të ekspozuar në vende të tjera të huaja, të cilat nuk përfshihen në analiza të mëtejshme.

Që nga fillimi i periudhës 2024, deri më sot, janë diagnostikuar dhe hetuar gjithsej 192 raste vendase të infeksionit me virusin e Nilit Perëndimor në Greqi, nga të cilat 143 raste kanë pasur manifestime të sistemit nervor qendror (SNQ, encefalit dhe/ose meningjiti dhe/ose paraliza akute flakcide) dhe 49 raste kishin manifestime të lehta/pa manifestime të SNQ.

Gjithashtu janë regjistruar gjithsej 30 vdekje në pacientët me infeksion viral të moshës mbi 60 vjeç.