Vijon sot raundi i dytë i bisedimeve për çështjen e emrit të Maqedonisë mes kryediplomatëve të Greqisë dhe Maqedonisë Nikos Kotzias dhe Nikola Dimitrov.
Diskutimet zhvillohen në Nju Jork në prani dhe të ndërmjetësuesit të OKB-së Methju Nimiç.
Burime qeveritare greke bënë të ditur se gjatë raundit të parë të së enjtes në tryezën e negociatave u përjashtua opsioni i Republikës Ilindenase të Maqedonisë.
Të njëjtat burime pohuan për mediat greke se në thelb të bisedimeve të cilat zgjatën plot 6 orë, ishin vetëm dy emra: Republika e Maqedonisë së Sipërme dhe Republika e Maqedonisë së Re.
Në diskutimet e gjata, pala greke ka insistuar në ndryshimet kushtetuese si një parakusht për anëtarësimin e Ish-Republikës Jugosllave të Maqedonisë në NATO.
Paralelisht me takimet e nivelit politik në Nju Jork po punojnë dhe grupet e punës në nivel teknik. Ndërkohë takimi i sotëm pritet të jetë vendimtar për ecurinë e negociatave.
