Polia e Durrësit ka finalizuar operacionin e koduar “Jewellery” duke ndaluar dy grabitës të rrezikshëm.
Ata u vidhnin me forcë varëset e floririt nga qafa grave të moshuara në hyrje të pallateve.
Në total janë zbardhur 7 vjedhje me forcë të varëseve të floririt, të kryera nga këta shtetas.
Në pranga përfunduan E. T., 34 vjeç banues në fshatin Arapaj dhe A. G., 35 vjeç, të dy banues në Durrës. 35 vjecari me iniciale A.G. ka qenë i shpallur në kërkim, pasi Gjykata e Kavajës kishte caktuar masën e sigurisë “Arrest në burg” në mungesë, për veprën penale “Vjedhja”.
Të dy këta persona në datën 10 dhjetor në lagjen Nr. 16, Durrës, në bashkëpunim me njëri-tjetrin, në hyrje të pallatit i kanë marrë me forcë një varëse floriri shtetases I. T., 68 vjeçe dhe janë larguar nga vendi i ngjarjes me automjetin tip “Opel” që e përdornin për të realizuar vjedhjet.
Por policia ka zbardhur edhe disa vjedhje të varëseve në lagje të ndryshme të qytetit nga këta dy persona dhe konkretisht:
-Më datë 12.12.2019, në lagjen Nr. 5, Durrës, kanë vjedhur varësen e shtetases P. G., 64 vjeçe;
-Më datë 04.11.2019, në lagjen Nr. 12, Durrës, kanë vjedhur varësen e floririt të shtetases D. M., 66 vjeçe;
-Më datë 27.10.2019, në lagjen Nr. 13, Plazh, kanë vjedhur varësen e floririt shtetases F. T., 67 vjeçe;
-Më datë 23.10.2019, dyshohet se i kanë vjedhur varësen e floririt shtetases H. A., 68 vjeçe;
-Më datë 15.10.2019, në lagjen Nr. 12, Durrës, kanë vjedhur varësen e shtetases T. B., 71 vjeçe;
-Më datë 10.10.2019, në Rrashbull, kanë vjedhur varësen e floririt shtetases V. H.
Në cilësinë e provës materiale u sekuestrua mjeti tip “Opel” që e përdornin për t’u larguar nga vendi i ngjarjes.
