Tre të rinj kanë rënë në prangat e policisë së Korçës për vjedhje biçikletash nëpër banesa.
Operacioni “Biçikleta”, u zhvillua për të goditur veprimtarinë kriminale në fushën e vjedhjes së banesave, ku si rezultat janë vënë në pranga S.Sh, 18 vjeç, banues në Pogradec, R.Sh, 16 vjeç dhe D.H, 16 vjeç, banues në Korçë.
Nga veprimet hetimore të kryera, rezulton se këta shtetas në bashkëpunim me njëri tjetrin, dyshohet të jenë autorë të 10 vjedhjeve të ndodhurra nëpër banesa në Korçë ku janë grabitur biçikleta dhe vegla të ndryshme pune.
Në cilësinë e provës materiale, u gjetën dhe sekuestruan 10 biçikleta të cilat pasi u vodhën nga autorët, janë shitur në qytetet e Korçës dhe Pogradecit.
Policia tha se vijon puna për dokumentimin me prova ligjore edhe të disa vjedhjeve të tjera, ku autorë të tyre dyshohet të jenë shtetasit e lartpërmendur.
