Sa shumë vite pritje për të rikthyer titullin kampion, aty ku dikur ky trofe ishte shumë “familjar”.
Liverpool tashmë është edhe matematikisht kampion i Anglisë, ekzatësisht 30 vite distancë nga titulli i fundit i festuar në 28 prill 1990.
Një triumf që u festua jo në fushë por duke qëndruar para televizorit, të mbledhur të gjithë për të ndjekur në TV, duelin Chelsea vs Manchester City.
Humbja 2 me 1 e “qytetarëve”, i vetmi ekip që u përpoq të mbante hapin e “The redsave”në këtë sezon, i dha jetë festës së skuadrës së Klopp.
Një feste legjitime që nuk e ndal dot as situata e pandemisë. 23 pikë diference nga Manchester City janë shumë, tmerrësisht shumë. E para sepse po flasim për një nga kampionatet më të forta në botë, dhe e dyta, sepse rival i Liverpool ishte as më shumë e as më pak por Manchester City i Pep Guardiolës.
Natyrisht merita e madhe i shkon profetit Jurgen Klopp i aftë për të ndërtuar nga hiçi me duart e tij dhe pa shpenzime marramendëse, një grup fantastik që fillimisht dominoi Europën dhe botën duke fituar Championsin në edicionin e kaluar bashkë me Superkupën e Europës dhe Botërorin e Klubeve.
E tani i la “targën” rivalëve në Angli. Geri Nevill ish lojtari i njohur i Manchester United dhe i kombëtares angleze me batute në fillim të sezonit do të deklaronte se nëse Liverpool shpallej kampion, ai do të priste një biletë për në Guinea Papua ne ishujt e Paqesorit. Tani ish mbrojtesi i njohur është “shpallur në kërkim”.
Liverpool i Jurgen Klopp vërtet nuk ka fenomenë të mëdhenj por është një miks mes talenteve shpërthyes si Gomez, Arnold apo Robertson dhe disa lojtarëve me esksperienc që kanë qënë vendimtare si Salah, Mané, Firmino, Henderson, Alisson dhe van Dijk apo Wijnaldum.
Ah, mos harrojmë, kampion është edhe një shqiptar, Xherdan Shaqiri. Edhe ai pavarësisht sesa protagonist ka qënë, ka të drejtë të festojë si të gjithë.
Ata që janë tifozë të Liverpool-it të madh të viteve 80 të shekullit të kaluar menjehere risjellin në vemendje ekipin legjendar të drejtuar nga Keni Dalglish me yje si Grobbelaar, Barnes, Ian Rush ,Staunton, Houghton, Whelan, Beglin etj. Një miks i traditës angleze dhe shpirtit irlandez që dominoi Premier League dhe tronditi Europën.
Sot historia përsëritet me një tjetër grup heronjsh fotot e të cilëve janë murosur anëkënd qytetit, me të njëjtin pasion në shkallet e “Anfield Roud”, e me të njëjtin entuziazëm në një qytet që sa shumë i kishte munguar titulli i më të mirëve të vendit.
Tani festojnë trofeun numër 19 në histori si kampion të Anglisë.
Ndoshta për të rihapur një cikël, si i ekipit legjendar nga 1980-1990…edhe pse nuk është më futbolli i asaj periudhe. / E.Sina
