Një tërmet me magnitudë 4.7 ballë goditi mbrëmjen e djeshme zonën vullkanike të Campi Flegreit, pranë Napolit, duke shkaktuar panik, dëme materiale dhe një seri të gjatë paslëkundjesh që vazhduan gjatë gjithë natës.
Lëkundjet e forta kanë shkaktuar dëmtime në disa ndërtesa, ndërsa pamjet nga zona tregojnë automjete të dëmtuara dhe rrugë të mbushura me kaos pas goditjes sizmike.
Lexo edhe :
View this post on Instagram
Sipas Institutit Kombëtar Italian të Gjeofizikës dhe Vullkanologjisë (INGV), kjo ishte lëkundja më e fortë e regjistruar në zonën e Campi Flegreit në më shumë se katër dekada.
Deri në orët e para të mëngjesit të sotëm u regjistruan mbi 40 paslëkundje, 11 prej të cilave me magnitudë nga 2 deri në 3.1 ballë. Goditja më e fortë pasuese u regjistrua në orën 05:47 me magnitudë 3.1.
Epiqendrat u lokalizuan në territorin e Pozzuolit dhe në zona të tjera pranë Napolit, duke bërë që lëkundjet të ndiheshin vazhdimisht nga banorët.
Nga frika e goditjeve të reja, shumë qytetarë e kaluan natën jashtë banesave, në makina, çadra ose ambiente të hapura.
Bilanci paraprak raportohet me 21 persona të plagosur. Dy prej tyre ndodhen në gjendje të rëndë, por jashtë rrezikut për jetën.
Shumica e të lënduarve kanë pësuar dëmtime nga rrëzimet, rënia e copave të suvasë ose gjatë përpjekjeve për t’u larguar nga banesat në panik.
/vizionplus.tv
