Video/ Mesazhi i ambasadores së SHBA: Lufta kundër COVID-19 ende nuk ka mbaruar
Ministrja e Shëndetësisë, Ogerta Manastirliu ka publikuar në “Facebook” mesazhin e ambasadores së SHBA-ve në Shqipëri, Yuri Kim, përmes së cilës iu bën thirrje qytetarëve që mos të tregohen indiferentë ndaj rrezikut nga transmetimi i COVID-19.
Kryediplomatja amerikane theksoi se kur distancimi social nuk është i mundur, është e nevojshme përdorimi i maskës, me qëllim mbrojtjen e vetes por edhe të tjerëve.
“Ne kemi bërë një rrugë të gjatë, por lufta kundër COVID-19 ende nuk ka mbaruar. Masat e rrepta kanë ndihmuar në kontrollin e virusit, por tani nuk është koha për t’u çlodhur. Le të bëjmë të gjithë pjesën tonë për njëri-tjetrin. Unë do të vendos maskë për ty, nëse ti do të vendosësh maskë për mua. E pranoj se ndonjëherë jam fajtore sepse nuk e kam vendosur maskën por nuk është kurrë vonë për të bërë gjënë e duhur. Prandaj, kur distancimi social nuk është i mundur, le të vendosim maskat dhe t’a mposhtim COVID-19 së bashku”, tha Kim.
