Partia Socialiste kërkon verifikimin e të gjithë deputetëve që tashmë ka në grupin e saj parlamentar, por edhe kandidatëve përpara se të vendosë nëse do t’i kandidojë ose jo për mandatin e ardhshëm në 18 qershor. Sipas letrës së dorëzuar në Prokurorinë e Përgjithshme, mesditën e se premtes, Edi Rama i drejtohet kryeprokurorit Adriatik Llalla, duke i kërkuar verifikimin bazuar në ligjin e dekriminalizimit.
Rama shkruan, se shpreson që ky verifikim të bëhet përpara datës 29 prill, ditë kur zyrtarisht në KQZ duhet të dorëzohen kandidaturat.
Ende nuk është bere e ditur nëse Rama ka përfshirë edhe kandidaturat e mbledhura nga drejtuesit e qarqeve.
Sipas shkresës së Ramës, “ky verifikim paraprak ndihmon reciprokisht për të lehtësuar punën voluminoze që duhet bërë nga ana e prokurorisë për verifikimin e kandidaturave të legjislaturës së ardhshme”. Por verifikimi i Llallës nuk do të jetë i vetmi brenda në grupin aktual të deputetëve të PS-së.
Lista përfundimtare e kandidatëve për deputetë miratohet nga Kryesia e PS.
