Zhvillimi i kryeqytetit ka qenë fokusi i bashkëbisedimit të nxënësve ekselentë të shkollës “Myslym Keta” me kryetarin e Bashkisë së Tiranës. Erion Veliaj teksa e lidhi situatën me atë çka po ndodh në Ukrainë u shpreh se ky shembull duhet të shërbejë si një moment reflektimi për vendin tonë.
“Një kolegu im, sot ministër i Presidentit Zelensky, në fillim të luftës ka menaxhuar çështjen e refugjatëve, e armëve dhe të ushqimeve në zonat e dyluftimit, dhe ajo që më tha më bëri përshtypje: ‘Ju s’keni ndonjë armik, për çfarë ziheni me njëri-tjetrin?’. Në fakt, duket shumë pyetje e thjeshtë, por shumë e rëndësishme. Na bën të reflektojmë se ne, në fakt, jemi armiqtë e vetes, ne nuk na pengon njeri. Pra, nuk është se është pushtuar gjysma e Shqipërisë dhe kjo po na ndalon të bëjmë shkollat e reja, të mbjellim pemë. Ne s’kemi asnjë armik dhe vitet e fundit ne i kemi prishur punë vetëm njëri-tjetrit”, tha Veliaj.
Veliaj u kërkoi të rinjve që të bëhen mbështetës të një kulture të re emancipimi dhe të mbështetjes së njëri-tjetrit për të ecur përpara.
“Sikur ne të mos ishim kundërshtarët e njëri-tjetrit – pra, një gocë të mos pengojë shoqen e saj të shkëlqejë në mjekësi; një nga çunat që kodon, s’duhet ta bëjë këtë se ka inat dikë tjetër, por se e ka pasion kodimin dhe teknologjinë e informacionit; dikush që po bën bamirësi, s’duhet sabotuar pse s’po e bën ti, përkundrazi, duhet të inkurajohesh që ta bësh edhe ti – nëse kjo do jetë fryma, nuk ka asgjë që e ndal këtë vend. Dua shumë që brezi juaj të jetë vërtet një flamurtar i kësaj kulture të re, i këtij emancipimi”, tha ai.
Sipas kryebashkiakut Tirana, pavarësisht debateve të forta, ka mundur që të ketë ndryshime të rëndësishme, duke u kthyer dhe në një qendër të samiteve të ndërkombëtare. /vizionplus.tv
