I riu shqiptar Leondard Farruku i cili dyshohet se vrau veten në anijen Bibby Stokholm, u la pa asnjë lloj ndihme për 12 orë. Këtë gjë e ka pohuar shoku i tij i dhomës, ish-konkurrenti i Lojërave të Commonwealth nga Sierra Leone, Yusuf Deen Kargbo.
Ky i fundit e përshkruan të riun shqiptar si një njeri të mirë dhe gjithmonë të buzëqeshur, teksa shton se nuk ka vënë re asnjë sjellje që të dyshonte se vuante nga problemet mendore. Kargbo tha se ai dhe Farruku kishin ndarë një dhomë për rreth një javë e gjysmë përpara vdekjes së tij.
Lexo edhe :
“Ishte një njeri i mirë dhe i sjellshëm që gjithmonë buzëqeshte dhe thoshte përshëndetje.
Leonardi nuk fliste shumë anglisht dhe të dy nuk kalonim shumë kohë në dhomat tona gjatë ditës. Por ai ishte miqësor dhe më tregoi se si t’i varja peshqirët në dhomën e dushit. Ndonjëherë e shihja duke parë video në telefonin e tij. Nuk dija për ndonjë problem të shëndetit mendor që ai mund të kishte pasur.”, tha ai.
20-vjeçari më tej ka rrëfyer për “The Guardian” edhe takimin e fundit me Leonard Farrukun. Ai thotë se e pa të riun shqiptar në dhomën e ngrënies, teksa kanë qenë për darkë. Më pas, kur janë ktheyer në dhomë, Kargbo ka tentuar të përdorë tualetin, por e ka gjetur derën mbyllur. Me mendimin se brenda ndodhej Farruku për nevojat personale, ai ka shkuar në një tjetër tualet. Më pas, rrëfen 20-vjeçari, ka shkuar në një pjesë të anijes ku i kapte ËiFi dhe pasi ka kryer një telefonatë, është rikthyer në dhomë dhe u shtri për të fjetur. Kur u zgjua herët në mëngjes, rreth orës 05:30, 20-vjeçari pa që jo vetëm krevati i shokut të tij ishte bosh, por edhe dera e tualetit ishte e mbyllur.
Në këto rrethana, ai thotë se ka lajmëruar personat përgjegjës, të cilët pasi kanë trokitur dhe nuk u është përgjigjur njeri, e kanë hapur derën me forcë dhe kanë gjetur Leonard Farrukun të pajetë.
“Trokita në derë dhe vazhdova të thosha: ‘Përshëndetje, përshëndetje’, por nuk mora përgjigje. Më pas ai ngriti alarmin me personelin e sigurisë në bord.
Në fillim nuk më morën seriozisht, por pasi i pyeta sërish, erdhën dhe e panë. Kur nuk morën përgjigje, hapën derën me forcë dhe e gjetën Leonardin pa ndjenja.
Kisha një ndjenjë të keqe për këtë. Policia vazhdoi të më bënte shumë pyetje dhe nuk më lejuan të kthehesha në dhomën time as për të marrë rrobat apo dokumentet e mia,” tha ai.
Ai tha se nuk iu ofrua asnjë mbështetje nga Zyra e Brendshme për t’u marrë me traumën që përjetoi.
“Gjërat janë shumë keq në maune. Frika më e madhe në mesin e azilkërkuesve është se Home Office do të heqë maune nga ankorimi i saj dhe ne do të zgjohemi për të gjetur se po lundrojmë për në Ruanda. Për këtë arsye shumë njerëz kanë frikë të flenë natën.”
Disa ditë pas vdekjes së Farrukut, shoku i dhomës u hoq nga maune si rezultat i ndërhyrjes së shoqatës bamirëse Care4Calais. Ai tani është zhvendosur në një hotel në Cardiff.
Motra e Farrukut, Jola Dushku, e cila jeton në Lombardi të Italisë, i tha “The Guardian” se vëllai i saj nuk kishte probleme të njohura të shëndetit mendor
“Leonardi ishte më shumë se një vëlla për mua dhe motrën tonë. Ai ishte një person shumë simpatik, ishte plot humor dhe mbi të gjitha ishte shumë i drejtpërdrejtë. Ai kishte shumë miq në Shqipëri dhe mbante marrëdhënie të forta me ta. Ai kurrë nuk do të fliste për askënd pas shpine.”, tha Jola Dushku, motra e Leonard Farrukut./vizionplus.tv
