Zhak Shirak, njeriu i dimensioneve të jashtëzakoshme politike u nda nga jeta në moshën 86 vjecare. Ai do të mbahet mend si personaliteti me karrierën më të gjatë në Europë. Shirak shërbeu si president i Francës në dy mandate, nga viti1995 deri në vitin 2007, ai gjithashtu drejtoi 8 vite kryeministrinë dhe Parisin për 18 vjet të tjera.
I etiketuar si “buldozeri” apo “vrasës i rivalëve politikë”, Shirak do të mbahet mend për reformat e gjithanshme politike dhe ekonomike, për avancimin e nismave për sigurinë rrugore, për zbutjen e tensioneve dhe pabarazisë sociale, si dhe për uljen e mandatit presidencial nga 7 në 5 vite.
Në arenën ndërkombëtare, Shirak do të kujtohet veçanërisht për vendimin e vitit 2003, kur doli kundër aleatit të vet, Amerikës, për çështjen e pushtimit të Irakut, por edhe për kontributin në përfundimin e luftës së Bosnjës dhe miqësinë me shtetet arabe.
Presidenti Ilir Meta në mesazhin e tij të ngushëllimit kujton rolin e madh dhe angazhimin personal të ish presidentit francez për ti dhënë fund genocidit në Kosovë. Parlamenti francez mbajti një minutë heshtje në kujtim të ish-udhëheqësit ndërsa nuk kanë munguar mesazhet e ngushëllimit nga shumë personalitete të politikës botërore.
