Policia britanike ka apeluar që kushdo që ka informacione rreth autorit të sulmit pranë parlamentit në Londër, t’ia përcjelle ato autoriteteve. Synimi është që të mund të identifikohen bashkëpunëtorë të mundshëm të tij, apo të dihen edhe vendet që ka frekuentuar. Sipas informacioneve të autoriteteve britanike, Khalid Masood, që shtypi me makinë tre persona dhe vrau edhe një polic me thikë, ishte konvertuar në fenë islame dhe më parë quhej Adrian Russell Ajoa, ndonëse përdorte edhe disa emra të tjerë.

 

Hetimet vijojnë për të kuptuar se çfarë e çoi atë drejt radikalizmit, nëse veproi i vetëm i frymëzuar nga propaganda terroriste, ose nëse ishte nxitur apo drejtuar nga persona të tjerë. Disa media raportojnë se ish-mësuesi i anglishtes mund të jetë radikalizuar në Arabinë Saudite dhe se kishte qëndruar 4 vjet në Lindjen e Mesme.

 

Një zyrtar i lartë i policisë njoftoi gjithashtu se janë arrestuar edhe dy persona të tjerë, duke e çuar në 10 numrin e të ndaluarve. Nga 31 të plagosur në spital dy janë në gjendje kritike. Viktima e katërt e sulmit, që u shtyp me automjet në Urën Westminster është identifikuar si një 75-vjeçar nga jugu i Londrës, ndërsa tre të tjerët janë një mësuese, një turist amerikan dhe polici.

 

Zyrtari i policisë se Londrës, Mark Rowley, tha gjithashtu se mund të ketë një rishikim të sigurisë së parlamentit pas kësaj ngjarjeje.

 

Leave a Reply

Your email address will not be published.