Për shkak të perfomancës së ulët dhe mosplotësimit të objektivave, janë dorëhequr shumica e krerëve të njësive administrative të PS, nënkryetarët dhe drejtorët e bashkive në shkallë vendi.
Ky vendim erdhi si rrjedhojë e kritikave të drejtuara publikisht nga kryeministri Edi Rama për të gjithë drejtuesit që rezultojnë të jenë edhe më afatgjatët në detyrë.
Edhe këtë të martë nuk kanë munguar dorëheqjet, edhe pse jashtë ulimatumit të kryeminsitrit Edi Rama i cili kishte vendosur ditën e hënë afatin final.
Këtë të martë, dorëheqjet kanë vijuar në bashkitë e Sarandës, Divjakës, Lushnjës, Vaut të Dejës, Selenicës, Belshit dhe Librazhdit.
Në Bashkinë Selenicë kanë dhënë dorëheqjen të pestë krerët e Njësive Administrative.
Ende nuk ka një lajm për dorëheqje administratorësh në Bashkinë e Vlorës, e cila ishte e para që u përball me kërkesat e Ramës për largime drejtuesish.
Në Bashkinë e Vaut të Dejës, pas një mbledhjeje të thirrur nga kryetari Kristian Shkreli, 3 zv/kryetarët e bashkisë, 5 administratorët dhe të gjithë drejtorët kanë paraqitur menjëherë dorëheqjen.
Edhe në Bashkinë Lushnjë janë dorëzuar të gjitha dorëheqjet. E njëjta situatë paraqitet edhe në Divjakë, ku dhe nënkryetari i Bashkisë dhe kryetarët e 3 nga 4 njësive administrative kanë dhënë dorëheqjen.
Një ditë më parë, dorëheqje pati edhe në njësitë administrative në bashkitë e mëdha të vendit si Elbasan, Korçë, Kukës, Shkodër.
Vizion Plus mësoi se nëpërmjet një formulari analitik të periudhës kohore Janar-Qershor 2025, ishin pasqyruar të dhënat për menaxhimin e fondeve dhe granteve që janë përdorur dhe mënyra se si ato janë menaxhuar. Të gjithë drejtuesit me performancë të dobët dhe që ndesheshin me situatë kontradiktore do të shkonin drejt aktit të dorëhqejes.
Të vetmit që nuk iu përgjigjën kërkesës së kryeministrit ishin 6 kryetarët e bashkive të djathta si dhe ajo e Konispolit me argumentin se drejtuesit në bashki janë të rinj dhe performanca e tyre po monitorohet./vizionplus.tv
