Kreu i grupit parlamentar të LSI-së Petrit Vasili, i ka quajtur quajti skenarë puçistë për të trembur qytetarët, informacionet e shpërndara nga policia për pjesmarrjen e grupeve kriminale në protestën e opozitës te parlamenti.
Sipas tij, policia kërkonte të ndalonte komunikimin mes organizatorëve me qëllim që të degradonte protestën në dhunë.
“Policia gjithashtu referoi në komunikatën e saj se kishte informacione të plota dhe të sigurta për nxitje të dhunës, organizime të natyrës kriminale dhe synohej hyrja me dhunë në sallën e Parlamentit të Shqipërisë. Këtë informacion të manipuluar me qëllimin e vërtetë ndalimin, pengimin dhe dekurajimin e protestë së jashtëzakonshme dhe të paparë të qytetarëve shqiptarë, iu shpërnda edhe trupit diplomatik në Shqipëri, miqve dhe partnerëve të Shqipërisë dhe mediave të huaja gjerësisht. Çfarë ndodhi realisht? Realisht qytetarët panë në sytë e tyre anembanë Shqipërisë përfshirë edhe mijërat e qytetarëve të shkëlqyer protestues, të cilët të gjithë së bashku organizuan një protestë shembull në të gjitha pikëpamjet për madhështinë dhe për mesazhin, që ishte pikërisht e kundërta e këtij skenari puçist të cilët këta horra që kanë rrëmbyer pushtetin dhe që e përdorin në funksion të frikës dhe të mbajtjes fort të lidhur tek karrigia, bën kundra qytetarëve të tyre. Ata e konsideruan opozitën gjoja një rrezik të sigurisë kombëtare. Ku qëndronte ky rrezik i sigurisë kombëtare? Si u përligj? Në funksion të po këtij skenari ogurzi u ndërpre edhe lidhja telefonike për orë të tëra. Gjoja me shkakun për informacione që rrezikojnë sigurinë kombëtare. Ishte pikërisht e kundërta. Për të lënë organizatorët e protestës pa mundësi komunikimi, që protesta të degradonte dhe për shkak të provokimeve të përgatitura me kujdes nga qeveria, kjo protestë të merrte një drejtim në atë pikëpamje që qeverisë i pëlqente dhe pastaj të demonizohej brenda dhe jashtë vendit.”
Gjithashtu në deklaratën e tij për mediat Vasili është shprehur se opozita është krejtësisht vigjilente dhe duke pasur informacione për këtë puç kishte marrë masa të saj të plota suplementare, për të mbajtur në kontroll të plotë mbarëvajtjen e protestës. Në fjalën e tij ai ka bërë thirrje që autoritetet përkatëse të marrin masat në lidhje me këto ngjarje.
“Prokuroria e vendit, pse jo edhe shërbimet partnere, të hetojnë gjerë e gjatë se cilat ishin këto informacione të manipuluara dhe mashtruese që u hodhën dhe u servirën në publik, që lejuan mbylljen me tela të Parlamentit, të cilat shpërndanë nëpër Kancelaritë ndërkombëtare informacion të rremë, të cilat lejuan bllokimin e telefonisë celulare të vendit për orë të tëra, duke lënë mijëra qytetarë pa komunikim me njëri tjetrin, qytetarë që mund të kishin edhe probleme personale të ndryshme.”
