Nënkryetari i LSI, Petrit Vasili kërkoi nga ndërkombëtarët që të mbajnë pretimin për zbatimin e reformës në drejtësi. Nëpërmjet një postimi në “Facebook”, Vasili tha se SHBA-BE duhet të sjellin në Shqipëri një Komision Hetim Monitorimi, për të kuptuar realisht sesi po zbatohet dhe monitorohet reforma në gjyqësor.
“Një Komision Hetim Monitorimi BE dhe SHBA për zbatimin e Reformës në Drejtësi është realisht një obligim i natyrshëm i tyre. Cënuam me vullnet sovranitetin duke përfshirë ndërkombëtaret edhe në Kushtetute në këmbim të sigurisë, që ata dhanë si garantë të integritetit të zbatimit të Reformës në Drejtësi.”
Për Petrit Vasilin, diçka të tillë e presin të gjithë shqiptarët nga faktori ndërkombëtar sepse kanë dhënë garanci për reformën.
“Heshtja nuk është sjellja që shqiptarët presin nga ndërkombëtarët për hetim monitorimin prej tyre të Reformës në Drejtësi. Shqiptarët presin zbatimin e Reformës në Drejtësi ashtu sikurse ajo u miratua në 21-22 korrik 2016, shqiptarët nuk mund të pranojnë shkeljen e Kushtetutës në zbatimin e reformës. Ndërkombëtaret garantuan. Tani është koha tu dalin për zot garancive, që dhanë dhe presionit insistues që bënë për miratimin e Reformës në Drejtësi si reformë për të vendosur shtetin ligjor dhe jo shtetin e kapur të Rilindjes!”
