Nënkryetari i LSI, Petrit Vasili vijoi me akuzat e tij ndaj punonjësve të policisë. Në një deklaratë për mediat, ai tha se efektivët ushtruan dhunë shtazarake gjatë protestës kundër shembjes së Teatrit Kombëtar.
Vasili kërcënoi policët duke deklaruar se çdo akt i tyre i dhunës është filmuar dhe të gjithë do të mbajnë përgjegjësi.
“I madh e i vogël në Shqipëri ka parë me sytë e tij se si është sjellë në mënyrë kriminale dhe shtazarake policia e Edi Ramës. Policia e Edi Ramës ka ndërhyrë e armatosur deri në dhëmbë ndaj artistëve, ndaj aktivistëve, ndaj qyteatrëve të thjeshtë dhe përfaqësuesve politik. Kjo sjellje shtazarake e policisë është zhvilluar në shkelje të plotë të të gjitha ligjeve, në dhunim të plotë të çdo norme njerëzore, në dhunim të plotë të çdo normë Kushtetuese. Planet dhe filmimet flasin vetë dhe ju keni gjithë mundësinë të shikoni dhe të përcillni dhunën që është ushtruar në mënyrë shtazarake, qenërore nga disa qen dhe maskarenj të pushtetit.”
Sipas Vasilit, do të dënohen edhe ata që urdhëruan policët të veprojnë në atë mënyrë.
“Kjo fytyrë e poshtër e urryer e krimit, do të ketë një përballje një për një, askush të mos ketë iluzionin që do të dënohen vetëm e vetëm ata që urdhëruan, do të marrin dënimin një për një të tërë ata që urdhëruan, por të tërë edhe ata që me zellin e tyre shtazarak nga 10 njëherazi janë vërsulur dhe kanë vënë çizmen, këpucën e tyre të fëlliqur mbi fytyrën e pastër të qytetarëve të ndershëm. Policia e cila u shkel syun kriminelëve, u hap dyert e komisariateve për t’u dorëzuar si lordër, njerëz mbi të cilët rëndojnë faje shumë të rënda, tregohen bishë dhe shtazë mbi qytetarët.”
