“Shqiptarët të bëjnë sa më mirë, të ndihmojnë njëri-tjetrin. Të kujdesen për jetën”! Kështu e ka mbyllur rrëfimin e tij një varrëmihës me emrin Rezhdi Hoxha nga Tirana. I ftuar në emisionin Oktapod të Turjan Hyskës, ai ka treguar detaje nga puna e tij e përditshme, prej 7 vitesh. Sipas llogarive të punëtorit të varrezave të Tufinës, në kryeqytet mesatarja e vdekjeve në ditë është 5 persona, të paktën aq varrosen mesatarisht në një ditë në Tufinë.
Ai tha se ka shqiptarë që shpenzojnë shumë për një varr. Më tej tregoi se ka qarë në dy varrime të njerëzve, që nuk i njihte aspak. “Ka raste që të afërmit blejnë 28 mijë euro një bust, e mbulojnë varrin me bronx e shpenzojnë 50 milionë lekë për një varr. Unë kam qarë dy herë nëpër varrime. Kam qarë për një fëmijë 4 vjeç, që kishte vdekur në një aksident. Kam qarë edhe tek varrimi i një djali të ri. Kur ulëm arkivolin, babai i tij u hodh mbi arkivol duke thënë se ishte vend për të dhe jo për djalin e tij. Në atë moment qanë të gjithë, qamë dhe ne”, ka treguar ai.
Pyetjes së Turjan Hyskës nëse dëgjohen zëra apo zhurma në varreza gjatë natës, punëtori i Tufinës i është përgjigjur me “Po”: “Natën më ka rastisur të punoj dhe dëgjohen zhurma. Jo zëra po zhurma, tinguj. Kemi frikë se normale njeriu ka frikë”. Më tej varrmihësi u shpreh se për shkak të punës, vdekjen e mendon çdo ditë. “Vdekjen time e mendoj përditë. Shoh shpesh ëndrra me të vdekur por jo fytyra të caktuara. Po shoh ëndrra me vdekje”, tha ai.
