Mjekja infeksioniste, Gjeorgjina Kuli ka folur në edicionin e lajmeve në “Vizion Plus” për vendimin e Komitetit Teknik për vaksinimin brenda datës 31 dhjetor të punonjësve të administratës publike, marketeve si dhe të qendrave tregtare.
E pyetur nga gazetari Roland Zili mbi arsyet e nxjerrjes së këtij urdhri, Kuli u shpreh se kjo masë është shumë e nevojshme në kushtet e reja të situatës epidemiologjike dhe daljes së variantit të ri të COVID.
“Nuk është urdhër për të bërë vaksinën me detyrim, është një nga opsionet që ofrohet, siç ishte deri tani praktika e ndjekur për personelin shëndetësor, stafin akademik, studentët, që përbëjnë rrezik jo vetëm për veten e tyre, por edhe për përhapjen e virusit tek personat me të cilët kontaktojnë. Aktualisht janë sugjeruar vaksinimet apo paraqitjet e një testi PCR për një periudhë kohore 5-ditore për të dëshmuar që nuk janë kontigjentë infektues. Në kushtet e reja, të situatës epidemiologjike, të stinës së dimrit, ku COVID luan rolin kryesor, por kërcënohen edhe nga infeksionet e tjera respiratore dhe në kushtet e dalje së mutacionit të ri, mendojmë që kjo masë është mëse e nevojshme.”
