Këtë të diel ka nisur vaksinimi masiv në Njësinë Vendore të Kujdesit Shëndetësor të Korçës. Sipas drejtorit të kësaj njësie, Mikel Llogori, ditën e parë të këtij vaksinimi masiv do të kryhen 400 vaksina ndërkohë që vaksinimi do të shtrihet në 19 qendra shëndetësore që nga zonat më të thella malore deri tek ato të fushës.
Ditën e sotme janë vaksinuar të moshës +80 dhe +90 por në këtë proces që në ditën e parë janë përfshirë edhe mosha të tjera. Nga dita e hënë, bëjnë me dije burime zyrtare, procesi i vaksinimit do të vijojë me dozën e dytë me personelin shëndetësor dhe atë arsimor.
Edhe në Qarkun e Elbasanit ka filluar vaksinimi i popullatës. Sipas Drejtorit të Shëndetit Publik, Xhevair Bogdani, të gjitha qendrat shëndetësore janë hapur dhe sipas planifikimit nga mjeku i familjes, kryhet edhe vaksinimi për popullatën. Duhet theksuar se megjithë thirrjet e qeverisë për vaksinimin e qytetarëve si masë mbrojtëse ndaj COVID-19, një pjesë e tyre janë skeptikë.
