Vaksinat kundër COVID prodhuan 9 miliarderë të rinj
Zbulimi dhe përhapja e vaksinave COVID-19 ka prodhuar 9 miliarderë të rinj në listën e më të pasurve në botë.
Fitimet nga prodhimi dhe shitja e vaksinave kanë sjellë të ardhura marramendëse për disa korporata farmaceutike, bazuar në Listën e më të Pasurve të publikuar nga Forbes.
Referuar këtyre të dhënave, Aleanca Popullore e Vaksinave, një grupim ndërkombëtar i shoqërisë civile, kërkon t’i jepet fund monopolizimit të tregut nga kompanitë prodhuese të vaksinave anticovid.
Aktivistët e Aleancës kanë treguar se pasuria e përbashkët e 9 miliarderëve shkon në 19.3 miliardë dollarë, shumë kjo e mjaftueshme për të vaksinuar plotësisht të gjithë njerëzit në vendet me të ardhura të ulëta.
Në krye të listës së miliarderëve të rinj të vaksinave ishin Shefi Ekzekutiv i Modernas, Stéphane Bancel dhe homologu i tij i BioNTech, Ugur Shahin. Tre emrat pasues në listë janë ortakët e kompanisë CanSino.
