Ushtria ruse bombardon disa qytete duke shkaktuar viktima dhe të plagosur

Ushtria ruse ka kryer një sërë sulmesh në disa qytete të Ukrainës, ku si pasojë e bombardimeve, 3 persona kanë humbur jetën dhe 13 të tjerë kanë mbetur të plagosur.

Ekipet e shpëtimit vazhdojnë kërkimet për një djalë të mitur, të mbetur nën rrënojat e një blloku apartamentesh, ndërsa viktima ishin prindërit e fëmijës. Një grua 64-vjeçare e paidentifikuar po ashtu u vra gjatë sulmeve.

Trembëdhjetë persona mes tyre 4 fëmijë u plagosën.

Ukraina jugore është më e goditura nga vale e fundit e sulmeve me raketa nga forcat e ushtrisë ruse.

Ndërkohë qyteti i dytë më i madh i Ukrainës, Harkivi, ka mbetur prej disa orësh pa energji elektrike.

Zyrtarët lokalë kanë thënë se nëntë objekte të infrastrukturës energjetike janë goditur nga sulmet me drone.