Ushtria amerikane po përgatitet për mundësinë e operacioneve të qëndrueshme, disajavore, kundër Iranit nëse presidenti amerikan, Donald Trump urdhëron një sulm.
Kështu deklaruan dy zyrtarë amerikanë për Reuters.
Zbulimi nga zyrtarët, të cilët folën në kushte anonimiteti për shkak të natyrës delikate të planifikimit, nxjerr në pah rreziqet për diplomacinë e vazhdueshme midis Shteteve të Bashkuara dhe Iranit.
Të dërguarit amerikanë Steve Witkoff dhe Jared Kushner do të zhvillojnë negociata me Iranin të martën në Gjenevë, me përfaqësues nga Omani që veprojnë si ndërmjetës.
Më herët, në një intervistë me gazetarët, Trump tha se ndryshimi i regjimit në Iran do të ishte gjëja më e mirë që mund të ndodhte.
Sekretari amerikan i Shtetit, Marco Rubio paralajmëroi të shtunën se, ndërsa preferenca e Trump ishte të arrinte një marrëveshje me Teheranin, “kjo është shumë e vështirë për t’u bërë”.
Ndërkohë, Trump ka grumbulluar forca ushtarake në rajon, duke rritur frikën e veprimeve të reja ushtarake.
Pentagoni po dërgon një aeroplanmbajtëse tjetër në Lindjen e Mesme, duke shtuar mijëra trupa të tjera së bashku me avionë luftarakë dhe raketa për të kryer sulme dhe për t’u mbrojtur kundër tyre.
Më 6 shkurt, delegacione nga Teherani dhe Uashingtoni zhvilluan bisedimet e para të ndërmjetësuara nga Omani.
