Prej më shumë se 10 ditësh urgjenca në Qendrën Spitalore Universitare “Nënë Tereza” është jashtë funksionit, si pasojë e zjarrit të rënë në një nga dhomat teknike.
Kjo ka sjellë shpërndarjen e pacientëve në spitalin “Shefqet Ndroqi” kur kanë probleme kardiake, ndërsa ata që vuajnë nga problemet gastrointestinale apo kanë nevojë urgjente për ndërhyrje kirurgjikale, çohen në spitalin e Traumës.
“Trauma trajton mesatarisht 200-220 urgjenca në ditë. Ne jemi të njoftuar edhe nga spitalet rajonale kur ata do të vijojnë tek ne në mënyrë që të përgatitemi”, thotë Drejtoresha e Spitalit Universitar të Traumës, Edlira Bode.
Vështirësia më e madhe lidhet me rastet e infarkteve ose hemorragjitë cerebrale pasi koha nuk premton për transportin e pacientit në spitale të tjera. Ndaj, në QSUT është improvizuar një dhomë për urgjencat e rënda.
Për të shmangur çdo sorollatje të qytetareve, ka një koordinim mes Urgjencës Kombëtare dhe Spitaleve Rajonale. Pacientët nga Gjirokastra, Vlora, Fier e Berati po trajtohen në spitalin Memorial në Fier, ndërsa ata nga Lezha dhe Shkodra në spitalin rajonal të Shkodrës.
“Kjo ka sjellë një shpërndarje të ngarkesës së punës në 4 pika dhe ky menaxhim ka sjellë një përgjigje në kohë”, thotë Drejtori i Urgjencës Kombëtare, Skënder Brataj.
Sipas Ministrisë së Shëndetësisë shumë shpejt spitali i ri në QSUT do t’i kthehet normalitetit pas incidentit të 11 shkurtit./vizionplus.tv
