Serbia deklaron se urdhër-arresti ndërkombëtar për kryeministrin e Kosovës, Ramush Haradinaj, është ende në fuqi. Kryetari i Komisionit për Kosovën dhe Metohine, Milovan Drecun, është shprehur për mediat se INTERPOL-i nuk e ka shfuqizuar urdhër-arrestin por “e bëri të padukshëm për vendet e tjera, përveç Serbisë”.
“Urdhër-arresti është bërë i padukshëm. Kjo do të thotë që Haradinaj mund të shkojë në Francë apo ndonjë vend tjetër, dhe askush nuk mund ta ndalojë, por në qoftë se vjen në territorin e Serbisë, nuk do të jetë ashtu”.
Zyrtari serb akuzoi INTERPOL-n duke thëne se është përdorur politikisht. Një ditë më parë, INTERPOL pranoi kërkesën e Policisë së Kosovës, për heqjen e urdhër-arrestit për kryeministrin Ramush Haradinaj, emri i të cilit ishte në mesin e 18 personave të shpallur në kërkim ndërkombëtar nga Beogradi për krime lufte.
