Një operacion i gjerë ndërkombëtar antidrogë, rezultat i një hetimi të përbashkët mes Prokurorisë Antimafia të Barit dhe Prokurorisë së Posaçme në Shqipëri, ka zbuluar rrjetin e një grupi kriminal të përfshirë në trafikun e lëndëve narkotike nga Shqipëria drejt Italisë dhe më tej në disa vende të Bashkimit Evropian dhe Amerikën e Jugut.
Gjatë këtij hetimi janë dokumentuar dhjetëra episode trafiku dhe pastrimi parash si dhe janë lëshuar masa sigurie për 52 persona në të dyja vendet.
Gazetari i Vizion Plus, Esido Barkaj në studion e Quo Vadis ka ndarë detaje nga ky megaoperacion, teksa deklaroi se “Ura” menaxhohej në Shqipëri.
Ai u shpreh se përdoreshin kryesisht linjat e autobusëve për të bërë shpërndarjen e pagesave të lëndëve narkotike.
Gazetari Barkaj tha se nga ky megaoperacion janë sekuestruar pasuri të paluajtshme, kryesisht apartamente, prona, automjete, llogari bankare, shuma të konsiderueshme parash dhe një televizion privat.
Pjesë nga biseda:
Borakaj: Si funksiononte grupi?
Barkaj: Kanë që prej një dekade minimumi që operonin në treg. Të dokumentuara janë 40 episode, 10 në Shqipëri, 30 në Itali. Janë kapur 2 ton kokainë. Ishte një megaoperacion sa i përket SPAK dhe Policisë së Shtetit, por edhe autoriteteve italiane. Kokaina sillej nga vendet e Amerikës Latine. Shpërndahej në Itali, por edhe në shtete të tjera të Evropës. Në Shqipëri vinin kryesisht paratë. Prej vitesh kishin ngritur kompani nga paratë që vinin nga trafiku i drogës. Kishin një dominim të frikshëm, ku shpërndahej te shtetasit italianë, pra ata ishin, le të themi, shpërndarësit. Dominimi ishte nga shqiptarët. Nga 52 masa sigurie, 29 janë lëshuar nga Gjykata e Posaçme në Shqipëri, ku baza ishte në Shqipëri, pra, menaxhohej nga këtu. Përdoreshin kryesisht linjat e autobusëve për të bërë shpërndarjen e pagesave. Pak raste janë që janë kapur në Durrës. Ka pasur edhe dërgesa me pagesa deri në 500 mijë euro me autobusë.
Borakaj: Çfarë u sekuestrua nga ky operacion në Shqipëri?
Barkaj: Janë sekuestruar pasuri të paluajtshme, kryesisht apartamente, prona, automjete, llogari bankare, si dhe shuma të konsiderueshme parash, të paktën 4 milionë euro. Gjithashtu, edhe një televizion privat, ku pronari ishte i përfshirë në skenën e krimeve. Në total, shuma është më e lartë dhe vlera e lëndës narkotike është të paktën 7 milionë euro. Janë shuma shumë të mëdha.
/vizionplus.tv
