Pak ditë më parë, Autoriteti Rrugor Shqiptar deklaroi për Vizion Plus se ka kryer inspektime pas rrëshqitjeve të pësuara në unazën e poshtme të qytetit të Burrelit.
Nga studimi gjeologjik – thotë ARRSH, i kryer nga një kompani e liçensuar janë evidentuar disa plane rrëshqitje të cilat varijojnë nga 4m deri në 13 m, të cilat dalin jashtë parashikimeve të nderhyrjes që kishte të parashikuar në projektin e zbatimit.
Gjithashtu, Autoriteti Rrugor Shqiptar tha se po kryen një ekspertizë të thelluar të situatës së krijuar dhe do të dalë me një zgjidhje tekniko–ekonomike për elemiminin e rrëshqitjeve dhe njëkohësisht garantimin e investimit të kryer.
Por edhe pse ka kaluar një muaj që kur ARRSH është vënë në dijeni nga të problemit nga ekspertët, nuk ka asnjë ndërhyrje për të riparuar apo parandaluar agravimin e mëtejshëm të situatës.
Unaza me gjatësi prej afro 900 metrash ka pësuar 4 shembje, ku dy prej tyre janë të përmasave të mëdha. Kostoja e rehabilitimit të këtyre shembjeve po rritet dita ditës për shkak se shembjet vazhdojnë të thellohen.
Projekti për sistemim asfaltimin e Unazës së Burrelit është financuar nga qerveria shqiptare nëpërmjet ARRSH dhe kap vlerën e 1.2 milion eurove. Objekti ka përfunduar brenda kontratës në Tetor të vitit të kaluar, ndërsa ende nuk është kolauduar dhe ARRSH nuk e ka marrë në dorëzim. Megjithatë, pritet një investim shtesë për të eleminuar shembjet e pësuara gjatë katër muajve të fundit./vizionplus.tv
