Zyra e Prokurorit të Qarkut Kharkiv paraqiti këtë të shtunë prova të tjera që dëshmojnë se Rusia sulmoi Ukrainën me raketa të blera nga Koreja e Veriut, duke shfaqur pamje të tyre.
Një këshilltar i lartë i presidentit, Volodymyr Zelensky, tha një ditë më parë se Rusia goditi Ukrainën këtë javë me raketa të siguruara nga Koreja e Veriut për herë të parë gjatë pushtimit të saj.
Dmytro Chubenko, një zëdhënës i zyrës së prokurorit, shtoi se raketa, një nga disa që goditi qytetin e Kharkiv më 2 janar, ishte vizualisht dhe teknikisht i ndryshëm nga modelet ruse.
“Metoda e prodhimit nuk është shumë moderne. Ka referenca për raketat standarde Iskander, të cilat i kemi parë në të kaluarën në sulmet në Kharkiv. Kjo raketë është e ngjashme me një nga raketat e Koresë së Veriut,” tha Chubenko për mediat, duke u treguar mbetjet e raketës.
Ai tha se raketa ishte disi më e madhe në diametër se Iskanderi rus, ndërsa ‘koka’ e saj, bobinat e brendshme elektrike dhe pjesa e pasme e raketës ishin gjithashtu të ndryshme.
“Kjo është arsyeja pse ne po anojmë drejt versionit se kjo është ndoshta një raketë që është furnizuar nga Koreja e Veriut”, përfundoi ai.
Megjithatë, Çubenko refuzoi të përmendte emrin e saktë të raketës.
Rusia sulmoi Kharkivin me raketa të shumta këtë javë, duke vrarë dy persona dhe duke plagosur më shumë se 60 në një nga sulmet më të mëdha me raketa dhe dron që nga fillimi i luftës në shkurt 2022.
Koreja e Veriut ka qenë nën një embargo armësh të Kombeve të Bashkuara që kur testoi një bombë bërthamore në vitin 2006./vizionplus.tv/
