Ukraina ka hedhur poshtë pretendimet e Rusisë se trupat e saj kanë marrë kontrollin e qytetit lindor të Ukrainës, Soledar, pas disa javësh luftimesh intensive.

Ministria ruse e Mbrojtjes deklaroi në një njoftim, më 13 janar, se brenda natës kishte pushtuar qytetin e rëndësishëm strategjik të minierave të kripës. Ditët e fundit, ka pasur disa raporte kontradiktore se kush e kontrollon qytetin, ndërkaq pretendimi rus nuk mund të konfirmohej në mënyrë të pavarur.

Lidhur me diskutimet për rëndësinë e Soledarit, Ukraina dhe Uashingtoni kanë thënë se shkatërrimi masiv, të cilin e ka bërë nga Rusia, nuk ia vlen për zonën, e cila tashmë është shkatërruar pas disa javë luftimesh dhe se me siguri nuk është mjaftueshëm e rëndësishme sa për ta kthyer në mënyrë të konsiderueshme luftën në favor të Moskës.

“Luftimet e ashpra po vazhdojnë ende në qytet”, tha Serhiy Cherevatiy, zëdhënës i grupit lindor të forcave të armatosura të Ukrainës, më 13 janar, në një koment për median RBC-Ukrainë, vetëm disa orë pas pretendimeve të ministrisë ruse.

“Forcat e armatosura të Ukrainës po e mbajnë situatën nën kontroll në kushte të vështira”, shtoi ai.

Më herët, më 13 janar, Ukraina njoftoi se po përballej me një ofensivë ruse “të intensitetit të lartë” ndaj Soledar.

“Nata në Soledar ishte e nxehtë. Luftimet kanë vazhduar. Armiku ka zhvendosur pothuajse të gjitha forcat e tij kryesore drejt Donjeckut dhe po mban një ofensivë me intensitet të lartë”, tha zëvendësministrja e Mbrojtjes e Ukrainës, Ganna Malyar.

“Kjo është një fazë e vështirë e luftës, por ne do të fitojmë në këtë luftë. Nuk ka dyshim”, shtoi ajo.

Ministria ruse e Mbrojtjes njoftoi se qindra ushtarë ukrainas u vranë në tre ditët e fundit të luftimeve dhe bombardimeve të ashpra. Zyrtarët ukrainas thanë se më shumë se 500 civilë ishin bllokuar brenda qytetit, duke përfshirë 15 fëmijë. Rusia nuk foli për viktima të mundshme civile.

Rusia po përdor resurse të konsiderueshme për betejën për Soledarin ndërsa po nis një sulm në qytetin Bakhmut, që ndodhet rreth 10 kilometra në jugperëndim. Soledar do t’i siguronte Rusisë një pozicion të sigurt dhe dominues të artilerisë me rreze veprim në qytetit.

Vendosja e kontrollit të plotë mbi Soledar bën të mundur ndërprerjen e rrugëve të furnizimit të trupave ukrainase në qytetin jugperëndimor të Artemovsk dhe më pas, bllokimin dhe futjen në “kazan” të njësive të Forcave të Armatosura të Ukrainës që kanë mbetur aty”, tha Ministria ruse e Mbrojtjes.

Pretendimi i ministrisë vjen disa ditë pasi biznesmeni i lidhur me Kremlinin, Yevgeny Prigozhin, i cili drejton grupin e dyshuar mercenar rus Wagner, tha se forcat e tij, duke vepruar në koordinim me trupat ruse, kishin pushtuar qytetin.

Kremlini, megjithatë, kundërshtoi deklaratat e Prigozhinit, duke thënë se ndonëse kishte një “dinamikë pozitive të përparimit”, njerëzit duhet të presin “informacionet zyrtare” për situatën.

Derisa Soledar konsiderohet me rëndësi strategjike, zëdhënësi i Këshillit të Sigurisë Kombëtare të SHBA-së, John Kirby tha se një fitore ruse atje, apo edhe në Bakhmut aty pranë, mund të mos ketë një ndikim të madh në trajektoren e luftës së Rusisë kundër Ukrainës, që tani është në muajin e saj të 11-të.

“Madje edhe nëse Bakhmut dhe Soledar bien në duart e rusëve, kjo nuk do të ketë asnjë efekt strategjik në vetë luftën”, u tha Kirby gazetarëve në Shtëpinë e Bardhë, më 12 janar, “dhe sigurisht që kjo nuk do t’i ndalojë apo ngadalësojë ukrainasit”.

Ndërkohë, një zyrtar i ministrisë së jashtme ruse tha më 13 janar se Bjellorusia mund të hyjë në konflikt nëse Kievi vendos të “sulmojë” atë ose Rusinë.

 

“Nga pikëpamja juridike, përdorimi i forcës ushtarake nga regjimi në Kiev ose invadimi në territorin e Bjellorusisë ose Rusisë nga forcat e armatosura të Ukrainës, është bazë e mjaftueshme për një përgjigje kolektive”, tha zyrtari i Ministrisë së Jashtme, Alexei Polischuk për agjencinë shtetërore ruse të lajmeve TASS.

Ai shtoi se megjithatë u takon liderëve të dy vendeve që të marrin një vendim të tillë. Ushtarët bjellorusë nuk morën pjesë në pushtim, por Minsku lejoi Rusinë të përdorte territorin e saj për të kryer operacione në konfliktin me Ukrainën.

Në fillim të kësaj jave, presidenti ukrainas Volodymyr Zelensky tha se spekulimet rreth potencialit për një ofensivë të përtërirë ruse përmes Bjellorusisë fqinje, tregojnë se forcat e mbrojtjes ukrainase “duhet të jenë gati si në kufi ashtu edhe në rajone”.

“Ne e kuptojmë se përveç deklaratave të forta, nuk shohim asgjë të fuqishme atje, por duhet të jemi gati si në kufi ashtu edhe në rajone”, tha ai më 11 janar.

Bjellorusia ndodhet drejtpërdrejt në veri të Ukrainës. Të dy vendet ndajnë kufirin që shtrihet për rreth 1.100 kilometra./R.E.L

Leave a Reply

Your email address will not be published. Required fields are marked *