Pas 265 ditësh luftë shkatërrimtare, Ukraina ka bërë thirrje për paqe. Ka qenë presidenti Volodimir Zelensky, i cili gjatë një lidhje-online me samitin e G20 në Indonezi kërkoi ti jepet fund luftës.

Por, presidenti ukrainas ka parashtruar një sërë kushtesh për Moskën para se të ulet në tryezë. Ai u bëri thirrje liderëve botërorë të mbledhur në samit, të mbështesin planin e tij.

 

VOLODYMYR ZELENSKY

PRESIDENTI I UKRAINES

Ukraina ka qenë gjithmonë në krye të përpjekjeve për paqe dhe bota e ka parë atë. Nëse Rusia thotë se synon t’i japë fund luftës, le ti jap. Ne nuk do të lejojmë Moskën të presë, të rigrupojë ushtrinë e saj dhe më pas të fillojë një seri të re aktesh terroriste, duke destabilizuar planetin. Nuk duhet të ketë një marrëveshje të tretë të Minskut, të cilën Rusia do ta shkelë sapo të arrihet. Ekziston një formulë ukrainase për paqen. Paqe për Ukrainën, për Evropën dhe botën.

 

Zelensky parashtroi planin me 10 pika ku përfshihen: Siguria bërthamore, Siguria ushqimore, Siguria energjetike, Lirimi i të gjithë të burgosurve dhe të internuarve, si dhe Përcaktimi i përfundimit të luftës.

 

Por i menjëhershëm ka qenë reagimi nga Kremlini. Ministri i Jashtëm, Sergei Lavrov, tha se kushtet për fillimin e negociatave janë padyshim joreale.

 

SERGEI LAVROV

MINISTRI I JASHTËM RUS

Ne e kemi konfirmuar vazhdimisht me gojën e presidentit Putin se nuk i refuzojmë negociatat. Nëse dikush refuzon, është Ukraina. Dhe sa më gjatë të refuzojë, aq më e vështirë do të jetë të negociohet.

 

Perëndimi ditët e fundit i ka bërë thirrje Ukrainës që të shohë mundësinë e negociatave të paqes. Vetë shefi i NATO-s, Jens Stoltenberg, theksoi se i takon Kievit të vendosë për fatin e vendit.

 

Leave a Reply

Your email address will not be published. Required fields are marked *