Hysen Kadiu, ish-kryetari i Partisë Demokratike në Kavajë, ka reaguar publikisht pas akuzave të ngritura ndaj tij në mbledhjen e Kryesisë së PD-së, ku kryetari Sali Berisha deklaroi se gjatë fushatës së zgjedhjeve të 11 majit ai kishte punuar për kryeministrin Edi Rama dhe nuk kishte dhënë asnjë kontribut për Partinë Demokratike.
Në një reagim në Facebook, Kadiu i ka cilësuar këto pretendime si të pavërteta, duke theksuar se aktiviteti i tij gjatë fushatës ka qenë publik dhe i njohur nga qytetarët e Kavajës dhe zonave përreth.
“Sikundër uji i ndenjur prej shumë vitesh ka nevojë për rifreskim, dhe këtë e thonë me zë të ulët edhe ata që përpara Sali Berishës heshtin”, shkruan Kadiu, duke lënë të nëkuptohet se edhe lidershipi i PD ka nevojë “për rifreskim”.
Mesazhi i plotë
Sot në mbledhje të Kryesisë, kryetari Sali Berisha, ndër të tjera, ka hedhur akuza edhe ndaj meje, se gjatë fushatës së zgjedhjeve të 11 majit kam punuar për Edi Ramën dhe nuk kam dhënë asnjë kontribut për PD.
I them doktor Berishës dhe të gjithë atyre që i rrinë afër dhe e kanë keqinformuar, se aktiviteti im gjatë fushatës është publik në Facebook-un tim. Sikundër, më mirë se kaq, këtë e dëshmojnë qytetarët e Kavajës dhe zonave përreth, që si në fushatë, para dhe pas saj, kemi qenë në kontakte dhe takime të vazhdueshme.
Beteja jonë nuk është me PD-në dhe demokratët, por me Edi Ramën. Çdokush që përpiqet të hedhë baltë mbi kontributin tim personal dhe të gjithë atyre që duan më të mirën për PD-në, janë të interesuar vetëm për karrigen e tyre.
Demokratët kanë sot më shumë se kurrë nevojë për bashkim dhe jo për përçarje, për organizim dhe jo për “armiq të brendshëm”. Asgjë e keqe nuk i vjen PD-së nga kritikat dhe riorganizimi. Sikundër uji i ndenjur prej shumë vitesh ka nevojë për rifreskim, dhe këtë e thonë me zë të ulët edhe ata që përpara Sali Berishës heshtin.
Ndërsa ne kemi vendosur ta themi me zë të lartë, përpara se të jetë vonë./vizionplus.tv
