Taulant Balla do të marrë zyrtarisht ditën e nesërme postin e ministrit të Brendshëm. Ceremonia e betimit do të mbahet në orën 11:00 në Presidencën e Shqipërisë. Socialisti Balla do të nisë një tjetër etapë në karrierën e tij politike, në një ndër postet më të rëndësishme të kabinetit qeveritar, i cili shpesh herë është dhe më i kritikuari nga opinioni publik.
Me propozim të kreut të qeverisë, Edi Rama, vendimi fillimisht u dekretuar nga presidenti, Bajram Begaj e më pas u votua me shumicë votash në kuvend. Dekreti mori 75 vota pro, 16 kundër dhe 1 abstenim, ndërsa emërimi i Ballës mori dhe duartrokitjet e deputetëve socialistë.
Me një karrierë të gjatë politike, i spikatur si deputeti më i votuar në zgjedhjet parlamentare të 2021, Balla pati një mesazh këtë herë jo vetëm për votuesit e tij, por për çdo qytetar shqiptar.
Përmes një shkrimi në rrjete sociale, Balla iu premtoi qytetarëve se do iu shërbejë me përulësi dhe mbi të gjitha nuk do i zhgënjejë.
Taulant Balla do të pasojë Bledi Çuçin në detyrën e re, teksa ky i fundit u shkarkua nga kreu i kabinetit, Edi Rama, pas skandalit të dhunës barbare të fisit Rraja.
Nga ana tjetër, mbetet për t’u parë nëse kryesocialisti Rama do të jetë i pranishëm në “kalimin e stafetës” tek Balla nga Çuçi, njësoj siç ka bërë kur ky i fundit u emërua si pasardhës i Sandër Lleshajt.
Ndërsa dekreti për shkarkimin e ministrit Bledi Çuçi mori 84 pro, tre kundër dhe tre abstenim.
