Isuf Mehmeti është 17-vjeçari që humbi jetën tragjikisht si pasojë e një aksidenti rrugor, që u regjistrua mbrëmë në dalje të Fushë Krujës.
17-vjeçari u përplas për vdekje nga një automjet tip “Hyundai”. Shoferi i automjetit i identifkuar si Andi Kullaj u arrestuar nga policia.
Shkak i aksidentit dyshohet të ketë qenë shpejtësia tej normave më të cilën po lëvizte automjeti. Për këtë arsye makina ka marrë zvarrë të miturin për rreth 50 metra, duke bërë që viktimës t’i bien nga xhepat sendet personale por edhe një këpucë nga këmba.
Lidhur me ndarjen nga jeta të 17-vjeçarit ka reaguar edhe Shkolla e Mesme Profesionale Kamzë. Mësuesit dhe shokët e shoqet e Isufit përmes një postimi në rrjetin social Facebook janë shprehur të tronditur nga humbja e papritur.
“Këtë të dielë u zgjuam me një lajm të dhimbshëm për të gjithë ne!
Isuf Mehmeti, nxënës i klasës XI-2 SHMT, u nda nga jeta mbrëmjen e shkuar, në një aksident me makinë, në Fushë Krujë. Shkolla jonë humbi një nxënës shembullor, shokët një djalë të shkëlqyer! Ngushëllime familjarëve, shokëve dhe kujtdo që e njohu Isufin! Pushoftë në paqe”, shkruhet në postim./vizionplus.tv/
