Dy persona janë arrestuar nga Policia Kufitare e Shkodrës pasi u kapën duke transportuar 15 emigrantë nga vendet e Afrikës, të cilët dyshohet se synonin të kalonin në mënyrë të paligjshme kufirin drejt Malit të Zi.
Operacioni i koduar “Halfway” u finalizua nga shërbimet e Drejtorisë Vendore për Kufirin dhe Migracionin Shkodër, në kuadër të kontrolleve për parandalimin dhe goditjen e rasteve të dhënies së ndihmës emigrantëve për kalim të paligjshëm të kufirit.
Në pranga ranë dy të rinj, Eridon Aliaj, 22 vjeç, dhe Mirgen Fusha, 19 vjeç, të dy banues në Fushë-Arrëz. Sipas policisë, ata u kapën në flagrancë në fshatin Vukpalaj, pranë kufirit me Malin e Zi, teksa po transportonin me një furgon 15 shtetas afrikanë, kundrejt pagesës.
Gjatë operacionit u sekuestrua edhe automjeti që përdorej për transportin e emigrantëve.
Njoftimi i policisë:
Shërbimet e Drejtorisë Vendore për Kufirin dhe Migracionin Shkodër, në vijim të kontrolleve intensive për parandalimin dhe goditjen e veprimtarisë kriminale të dhënies ndihmë emigantëve, për kalim të paligjshëm të kufirit, bazuar dhe në informacionet e siguruara në rrugë operative, organizuan dhe finalizuan operacionin e koduar “Halfëay”.
Si rezultat i operacionit, u arrestuan shtetasit Eridon Aliaj, 22 vjeç dhe Mirgen Fusha, 19 vjeç, të dy banues në Fushë-Arrëz.
Këta shtetas u kapën në flagrancë nga shërbimet e Policisë Kufitare, në fshatin Vukpalaj, afër kufirit me Malin e Zi, duke transportuar me një automjet furgon, 15 emigantë nga vende të Afrikës që synonin të kalonin në mënyrë të paligjshme në territorin e Malit të Zi.”
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
