Turizmi konsiderohet një sektor me risk, ndaj edhe gjatë sezonit veror merr një vëmendje edhe më të madhe nga administrata tatimore. Gjatë kësaj periudhe, tatimet kanë arritur të kontrollojnë rreth 6500 subjekte që operojnë në zona bregdetare por edhe malore, nga të cilët 36 % e tyre ose 2300 janë penalizuar.
Këtë sezon filloi të aplikohej edhe TVSH e turizmit në masën 6%. Sipas të dhënave nga tatimet, gjatë muajit korrik kanë përfituar 1100 subjekte, ndërsa TVSH e munguar në buxhet arrin në 189 milion lekë. Kjo do të thotë se këto para kanë shkuar për bizneset, të cilat sikundër pritej, nuk kanë reflektuar në ulje çmimi për konsumatorët.
Por pavarësisht uljes së TVSH, të ardhurat nga turizmi shënuan rritje gjatë muajit korrik, ndërsa pritet edhe bilanci i gushtit dhe shtatorit, për të parë ecurinë e këtij sektori.
