Të gjithë ata që kanë menduar të kalojnë festimet e krishtlindjes dhe fundvitit në Paris janë të shqetësuar për gjendjen kaotike në të cilën ndodhet kryeqyteti francez pas grevës kombëtare e cila po vijon për të nëntën ditë radhazi. Pasojat janë reflektuar ndjeshëm tek bizneset si dhe agjencitë e udhëtimeve.
Transporti publik në Francë vijon të mbetet i pezulluar duke shkaktuar një kaos për udhëtarët, shumica e të cilëve i janë kthyer biçikletave. Sindikatat kanë deklaruar se do të vazhdojnë protestën e tyre kundër reformës së pensioneve deri në fund të dhjetorit. Ditën e martë edhe shkollat do të mbyllin dyert duke u bërë pjesë e grevës kombëtare. Gjithashtu të dyja operat në Paris, Garnier dhe Bastille, anuluan shfaqjet e së Premtes dhe gjatë fundjavës.
Presidenti Emmanuel Macron shprehu solidaritetin e tij me njerëzit e prekur nga greva dhe bëri të qartë se nuk do të tërhiqet nga plani i reformës. Macron e cilëson reformën e pensioneve si historike dhe të domosdoshme për vendin.
Edhe jelekeverdhët kanë dalë sërish në rrugë këtë të shtunë, për të mbajtur një tjetër marrshim, gati një muaj pasi lëvizja festoi përvjetorin e saj. Protestat e tyre të përjavshme filluan në 17 nëntor të vitit 2018, kundër rritjes së çmimit të karburantit. Ndërsa qeveria braktisi planin e saj për të rritur taksën e karburantit, demonstruesit kërkojnë tashmë taksat më të ulëta, rritje të pagave dhe dorëheqjen e presidentit Emmanuel Macron.
