Gazetari Mentor Kikia, i ftuar në studion e “Quo Vadis” në Vizion Plus këtë të enjte, ka analizuar atë që pritet të ndodhë në tryezën politike të thirrur nga Partia Demokratike.
Kikia tha se ajo që PD po kërkon të bëjë është t’u mbushë mendjen njerëzve se po u shtrin dorën partive të reja, por ato nuk pranojnë.
Sipas tij, arsyeja pse shqiptarët nuk dalin në shesh nuk lidhet me faktin se e duan qeverinë, por me mungesën e një alternative bindëse.
“Përmbytja politike është më e madhe se përmbytja e vendit. Ftesa e PD-së për nesër është një përpjekje për të thënë: unë po i ftoj, por ata nuk duan. Java e fundit e vitit 2025 tregoi një anë komike, ku katër faktorë opozitarë kishin një garë se cila forcë mblidhte më shumë njerëz në sheshe, dhe më pas e përmbylli vetë PD-ja, duke treguar se vazhdon të jetë partia më e madhe.
Sot opozita, në tërësi, që nuk është vetëm PD-ja, por edhe populli opozitar, mendon se duhet të dalë në rrugë, por nuk del për arsye të ndryshme. Pyetja se pse shqiptarët nuk dalin në protestë mbetet pa përgjigje. Çështja është se vetë partitë opozitare nuk duhet të kërkojnë vetëm largimin e Ramës, por të ofrojnë alternativën e duhur.
Sot opozita del në rrugë, por pa zgjidhje tjetër përveç forcës së numrave. Një qeveri që përballet me protesta të forta dorëzohet, por nuk dorëzohet përballë protestave dyorëshe. Asnjë nga partitë e reja nuk do të shkojë”, tha Kikia.
