Presidenti i Shteteve të Bashkuara Donald Trump ka uruar Kosovën me rastin e 18-vjetorit të Pavarësisë.
Në një letër dërguar presidentes, Vjosa Osmani kreu i Shtepisë së Bardhë ka theksuar se vendi i tij mbetet i palëkundur në mbështetjen e sovranitetit dhe integritetit territorial të Kosovës.
“Shtetet e Bashkuara mbeten të palëkundura në mbështetjen për sovranitetin dhe integritetin territorial të Kosovës. Ndërsa marrëdhëniet tona vazhdojnë të thellohen, ne presim me padurim ta zgjerojmë partneritetin tonë, përfshirë përmes rritjes së tregtisë dhe investimeve që nxisin prosperitetin e përbashkët”, thuhet në letrën e Presidentit Trump.
Presidenti amerikan ka përgëzuar Kosovën për pjesëmarrjen në themelimin e Bordit të Paqes, si dhe për mbështetjen e saj në përpjekjet e SHBA-së për t’i zgjidhur problemet globale në Ukrainë, Gazë dhe vende tjera.
“Teksa marrëdhënia mes dy vendeve vazhdon të rritet, ne mirëpresim zgjerimin e partneritetit përmes bashkëpunimit tregtar dhe investimeve. Shtetet e Bashkuara janë të gatshme të punojnë së bashku me Kosovën për të avancuar paqen dhe stabilitetin për të mirën e përbashkët”, thuhet në letrën e Presidentit Trump.
Ndërkohë presidentja e Kosovës Vjosa Osmani ka falenderuar Trump për urimin në pragë të ditës së Pavarësisë.
“Faleminderit Presidentit Trump për urimin e përzemërt për popullin e Kosovës në prag të Ditës së Pavarësisë, si dhe për mbështetjen e palëkundur për sovranitetin dhe integritetin territorial të Republikës së Kosovës. Kosova do të qëndrojë gjithnjë krah aleatit tonë strategjik, Shteteve të Bashkuara të Amerikës, në përpjekjet për paqe, stabilitet dhe një botë më të sigurt”, tha Osmani.
Megjithatë, marrëdhëniet mes Kosovës dhe SHBA-së herë pas here kanë qenë të tensionuara, për shkak të disa veprimeve të qeverisë se kryeministrit Albin Kurti që kishin të bënin me minoritetin serb dhe në sytë e zyrtarëve amerikanë ishin të njëanshme dhe të pakoordinuara.
Për pasojë, Uashingtoni vitin e kaluar ka pezulluar Dialogun Strategjik me Prishtinën. SHBA-ja ka qenë ndër vendet e para që e ka njohur pavarësinë e Kosovës, të shpallur më 17 shkurt 2008. Shtetësia e saj njihet nga 121 vende por sfidë mbetet ende mungesa e njohjes nga katër shtete të NATO-s dhe pesë të Bashkimit Evropian.
