Më pak se një javë pasi familja e tij paralajmëroi se ndodhej “në prag të vdekjes”, ish-marinsi amerikan Robert Gilman është liruar nga autoritetet ruse dhe po kthehet në Shtetet e Bashkuara së bashku me nënën e tij.
Gilman, i cili kishte qëndruar në burg në Rusi për më shumë se katër vjet, raportohet se ishte në gjendje të rëndë shëndetësore dhe nuk reagonte, ndërsa ushqehej përmes një sonde.
Lirimi i tij u bë përmes një faljeje humanitare të urdhëruar nga presidenti rus Vladimir Putin, pas përpjekjeve intensive diplomatike të administratës së Donald Trump.
Ndryshe nga marrëveshjet e mëparshme mes Moskës dhe Uashingtonit, në këtë rast nuk pati shkëmbim të të burgosurve dhe Rusia nuk mori kompensim zyrtar. Zyrtarët amerikanë e cilësuan lirimin si një “gjest humanitar”.
Presidenti Donald Trump njoftoi lirimin përmes Truth Social dhe tha se kishte folur me Gilmanin ndërsa ai ndodhej në avion duke lënë Rusinë.
Sipas Trump, kërkesa e parë e ish-marinsit ishte një hamburger me djathë, të cilin presidenti tha se do të kujdesej personalisht që ta merrte.
Rasti i Gilmanit kishte shkaktuar shqetësim të madh lidhur me trajtimin e tij gjatë qëndrimit në paraburgim dhe burgjet ruse.
Organizata për të drejtat e njeriut dhe Global Reach, e cila kishte mbështetur familjen e tij, pretenduan se ai kishte përjetuar abuzim të zgjatur, kushte të rënda dhe ishte detyruar të merrte medikamente.
Me përkeqësimin e gjendjes së tij, Gilman u transferua nga një institucion paraburgimi në repartin psikiatrik të një spitali civil.
Atje ai u përshkrua si ndodhur në një gjendje “stupori disociativ”, ku personi është kryesisht i pandjeshëm ndaj mjedisit përreth.
Nëna e tij udhëtoi drejt Rusisë për të takuar të birin, por sipas raportimeve, nuk u lejua të hynte në spitalin ku ai po trajtohej. Të dy u ribashkuan më në fund në bordin e avionit që po e kthente Gilmanin në SHBA.
32-vjeçari pritet t’i nënshtrohet një serie të gjerë ekzaminimesh mjekësore dhe një programi rehabilitimi në një spital ushtarak në Teksas.
Gilman u arrestua në vitin 2022 pas një incidenti në një tren në Voronezh. Autoritetet ruse e akuzuan se kishte sulmuar një efektiv policie, ndërsa ishte nën efektin e alkoolit.
Familja e tij ka këmbëngulur se incidenti ishte aksidental dhe ndodhi pasi Gilman ishte ndier keq. Sipas familjes, efektivi nuk kishte pësuar dëmtime dhe nuk kishte kërkuar ndjekjen penale të tij.
Fillimisht, Gilman u dënua me katër vjet e gjysmë burg, por më vonë dënimi iu zgjat pas akuzave të tjera se kishte sulmuar punonjës të burgut.
Familja dhe organizatat që e mbështesnin i kanë kundërshtuar këto akuza, duke argumentuar se ato lidhen me abuzimin dhe përkeqësimin e gjendjes së tij gjatë kohës në paraburgim.
Motra e tij, Lexi Hudson, e mirëpriti lirimin dhe ia atribuoi ndërhyrjes së Trumpit. Ajo akuzoi gjithashtu autoritetet ruse për abuzim të rëndë ndaj vëllait të saj.
Departamenti Amerikan i Shtetit deklaroi se shpreson që lirimi i Gilmanit të ndihmojë në krijimin e kushteve për lirimin edhe të amerikanëve të tjerë të burgosur në Rusi, mes tyre Stephen Hubbard, i cili nga zyrtarët amerikanë konsiderohet gjithashtu i ndaluar në mënyrë të padrejtë.
