Trump shkarkon Rex Tillerson
Një vendim i bujshëm që ngre skema të reja dyshimi mbi politikën amerikane është marrë sot nga presidenti i SHBA.
Donald Trump ka njoftuar në twitter shkarkimin e sekretarit të shtetit Rex Tillerson. Ai do të zëvendësohet nga drejtori i CIA-s Mike Pompeo, ndërsa në vendin e këtij të fundit do të jetë Gina Haspel, gruaja e pare që do të qëndrojë në krye të agjencisë së spiunazhit.
Tillerson qëndroi vetëm një vit në këtë post dhe herë pas here kanë qenë të dukshme mospajtimet e tij me presidentin amerikan, sa i takon politikës së jashtme.
Një zyrtar i lartë i administratës tha se Trump e mori këtë vendim në këtë kohë me qëllimin qe të krijojë një ekip të ri përpara bisedimeve të ardhshme me Kim Jong-Un.
Tillerson të premten tha se vendimi i Trump për t’u takuar me liderin e vendit komunist nuk ishte ndonjë surprizë në asnjë mënyrë.
Kjo erdhi më pak se një ditë pasi sekretari i shtetit tha se kushtet ende nuk ishin të gatshme për negociata me Korenë e Veriut.
Në një deklaratë me shkrim të shpërndarë nga Shtëpia e Bardhë, presidenti amerikan nuk ka shpjeguar aspak arsyet e shkarkimit të Tillerson, por ka thënë se Mike Pompeo e ka treguar me punën e tij se është personi i duhur për të rikthyer pozitën e Amerikës në botë, forcimin e aleancave, përballjen me kundërshtarët, si dhe përpjekjet për denuklearizimin e gadishullit Korean.
