Trump pret Mark Rutte në Shtëpinë e Bardhë
Presidenti i SHBA-ve, Donald Trump, pret shefin e NATO, Mark Rutte, në Shtëpinë e Bardhë të mërkurën, ndërsa lufta me Iranin ka çuar marrëdhëniet e SHBA-së me anëtarët e tjerë të aleancës ushtarake në një pikë krize.
Presidenti republikan ka kërcënuar të tërhiqet nga aleanca transatlantike me 32 anëtarë dhe ka kritikuar aleatët europianë të Uashingtonit javët e fundit për atë që ai e quajti mbështetje të pamjaftueshme për fushatën bombarduese SHBA-Izrael kundër Iranit. Trump tha të martën se sulmet do të ndaleshin pasi të dy palët ranë dakord për një armëpushim dyjavor.
Trump u ka bërë thirrje vendeve që varen nga nafta e rajonit të Gjirit të thyejnë kontrollin e Iranit mbi Ngushticën e Hormuzit, por vendet europiane nuk pritet të marrin pjesë në operacione pastrimi minash apo misione të tjera për të siguruar lundrimin, për sa kohë vazhdojnë armiqësitë, sipas dy diplomatëve europianë.
Irani është zotuar të pengojë këtë pikë kyçe strategjike me mina derisa të përfundojë lufta.
Rutte, i njohur në Europë si një “pëshpëritës i Trump-it”, ka ndërtuar një marrëdhënie të ngrohtë me Trump pavarësisht tensioneve dhe vitin e kaluar iu referua atij si një “babi” që menaxhon një grindje në oborrin e shkollës mes Izraelit dhe Iranit. Një diplomat tjetër europian e përshkroi qasjen e Rutte ndaj Trump si të përulur, por efektive.
