Presidenti i Shteteve të Bashkuara të Amerikës Donald Trump, ka njoftuar se mbyllja e qeverisë do të vazhdojë deri kur demokratët t’i japin dritën jeshile ndërtimit të murit me Meksikën.
“Nuk ju them dot se kur do të rifillojë punën qeveria. Mund t’ju them se nuk do të hapet deri kur te kemi një mur, një gardh, çfarëdo që të duan ta quajnë”, tha Trump nga shtëpia e bardhë.
Ai njoftoi se qindra mijëra punonjës federalë që janë pezulluar për shkak të mbylljes së qeverisë prej 5 ditësh, janë dakord me ndërtimin e murit. Megjithatë Trump shtoi se nuk ka ende përparim për arritjen e një marrëveshjeje për buxhetin.
Ndërkohë udhëheqësit demokratë fajësojnë presidentin Trump për ngërçin me Kongresin dhe zhytjen e vendit në kaos. Sipas tyre kreu presidenti kërkon miliarda dollarë për t’I shpenzuar për një mur të kushtueshëm dhe joefikas, dhe se amerikanët nuk e mbështesin një gjë të tillë.
Ndërkohë një 8 vjeçar nga Guatemala humbi jetën të martën ndërsa mbahej nga autoritetet federale amerikane, duke shënuar kështu vdekjen e dytë brenda një muaji të një fëmije emigrant të ndaluar në SHBA. Fëmija ndërroi jetë në një spital për shkak të të ftohtit.
Më herët një 7 vjeçare humbi jetën në fillim të dhjetorit ndërsa mbahej nga Agjencia e Doganave dhe Kufirit, pasi kaloi kufirin amerikan me babain e saj emigrant.
