Presidenti i Shteteve të Bashkuara, Donald Trump, nënshkroi dy urdhra ekzekutivë që synojnë të kufizojnë të drejtën e shtetësisë automatike për fëmijët e lindur në territorin amerikan, duke sfiduar edhe një herë interpretimin e Amendamentit të 14-të të Kushtetutës së SHBA-së.
Kufizimi i kësaj të drejte është një nga prioritetet kryesore të administratës Trump në luftën kundër emigracionit. Masat e reja fokusohen veçanërisht te fenomeni i njohur si “turizmi i lindjes”, kur gra shtatzëna nga vende të tjera udhëtojnë drejt SHBA-së për të lindur, në mënyrë që fëmijët e tyre të marrin shtetësinë amerikane.
“Kjo praktikë e të ashtuquajturit ‘turizëm i lindjes’, që nga nënshkrimi i këtij urdhri, shpallet e ndaluar.“, tha këshilltari i Shtëpisë së Bardhë, Stephen Miller, gjatë ceremonisë së nënshkrimit në Zyrën Ovale të enjten.
Urdhrat e rinj parashikojnë gjithashtu kufizime për fëmijët e lindur nga punonjës të qeverive të huaja në SHBA, si edhe për fëmijët e personave të klasifikuar nga autoritetet amerikane si “armiq të huaj”.
Lëvizja e Trump vjen pasi më 30 qershor Gjykata Supreme rrëzoi si antikushtetues një urdhër të mëparshëm të tij, i cili synonte t’u mohonte shtetësinë fëmijëve të lindur në SHBA nga prindër që ndodheshin në vend në mënyrë të paligjshme ose me status të përkohshëm. Administrata argumenton se urdhrat e rinj janë më të kufizuar dhe nuk bien ndesh me vendimin e gjykatës.
Megjithatë, ekspertët e ligjit dhe organizatat që mbrojnë të drejtat e emigrantëve paralajmërojnë se edhe këto masa pritet të sfidohen në gjykatë. Sipas tyre, Amendamenti i 14-të garantonshtetësinë për pothuajse çdo person të lindur në territorin amerikan dhe një president nuk mund ta ndryshojë këtë të drejtë vetëm përmes një urdhri ekzekutiv.
Trump, duke folur të enjten në Zyrën Ovale, e cilësoi vendimin 6-3 të Gjykatës Supreme më 30 qershor si “një vendim shumë të gabuar”, duke kritikuar faktin se “njerëzit po ndërtojnë biznese rreth turizmit të lindjes”.
“Kjo nuk është mënyra se si duhet të funksionojë. Është një turp. Ata po blejnë rrugën e tyre drejt shtetësisë dhe ne nuk do ta lejojmë këtë“, tha ai.
Trump shtoi se Amendamenti i 14-të ishte miratuar për një arsye tjetër historike. “Kjo u bë pas Luftës Civile. Kjo ishte për fëmijët e skllevërve. Po çfarë po ndodh tani?“, deklaroi presidenti amerikan.
/vizionplus.tv
