“Terroristi më aktiv në botë”, Trump: Forcat amerikane dhe nigeriane vranë “numrin dy” të ISIS
Presidenti amerikan Donald Trump deklaroi se forcat amerikane dhe ato të Nigerisë kanë vrarë një prej drejtuesve më të lartë të ISIS-it gjatë një operacioni ushtarak të zhvilluar në Afrikë.
Në një postim në rrjetin social Truth Social, Trump tha se misioni i përbashkët ishte “ekzekutuar në mënyrë perfekte” për të eliminuar “terroristin më aktiv në botë”, Abu-Bilal al-Minuki.
Al-Minuki ishte shpallur nga Uashingtoni si “terrorist global i veçantë” në vitin 2023.
Deri tani, ushtria nigeriane nuk ka komentuar mbi operacionin. Nëse konfirmohet, vrasja e tij do të konsiderohej një tjetër goditje e rëndë për ISIS pas eliminimit të liderit të grupit, Abu Bakr al-Baghdadi, në vitin 2019.
I njohur edhe si Abu Bakr ibn Muhammad ibn Ali al-Mainuki, ai drejtonte celula të lidhura me ISIS në Afrikë.
Trump nuk dha detaje të tjera mbi operacionin apo kohën kur është zhvilluar misioni ushtarak.
Presidenti amerikan e cilësoi eliminimin e tij si një goditje të madhe ndaj rrjeteve afrikane dhe globale të ISIS, duke theksuar se operacioni do të dëmtojë strukturat drejtuese dhe kanalet e financimit të organizatës.
Ai falënderoi gjithashtu qeverinë nigeriane për “partneritetin”, duke shtuar se Al-Minuki “nuk do të terrorizojë më popullin e Afrikës dhe nuk do të ndihmojë më në planifikimin e sulmeve ndaj amerikanëve”.
