Trump: Evitova përplasjen Kosovë-Serbi, Izraeli dhe Irani do bëjnë shumë shpejt paqe

Në një postim në rrjetet sociale presidenti amerikan Donald Trump ka deklaruar se në mandatin e tij të parë Kosova dhe Serbia kanë qënë në prag lufte, por ai mundi ta ndalojë atë.

“Gjatë mandatit tim të parë, Serbia dhe Kosova ishin duke e përshkallëzuar situatën me intensitet , siç kanë bërë për shumë dekada, dhe ky konflikt i vjetër ishte gati të shpërthente në luftë. Unë e ndalova atë, Biden ka dëmtuar perspektivat afatgjata me disa vendime shumë budallaqe, por do ta rregulloj përsëri”, tha Trump.

Po ashtu Trump përmendi ndërmjetësimet e tij edhe në konfliktet mes Indisë dhe Pakistanit, si dhe Egjiptit dhe Etiopisë, duke paralajmëruar se së shpejti do të arrihet paqe edhe mes Izraelit dhe Iranit.

“Irani dhe Izraeli duhet të bëjnë një marrëveshje dhe do e bëjnë atë! Ashtu siç bëra marrëveshjen mes Indisë dhe Pakistanit. Së shpejti do të kemi paqe mes Izraelit dhe Iranit. Shumë takime dhe telefonata po zhvillohen tani”, tha Presidenti.

“Unë bëj shumë, dhe nuk marr kurrë merita për asgjë, por kjo është në rregull, populli e kupton.”

Me këtë fjali e mbyll edhe deklaraten e tij kreu i Shtëpisë së Bardhë Donald Trump./vizionplus.tv