Disa ligjvënës amerikanë i bënë thirrje Shtëpisë së Bardhë që ta dërgojë Sayfullo Saipovin, të akuzuarin për vrasjen e tetë personave në Nju Jork, në burgun ushtarak në Guantanamo.
Sayfullo Saipov, 29 vjeç, akuzohet gjithashtu se i ka siguruar ISIS-it materiale dhe burime të ndryshme.
Presidenti Donald Trump tha se po e shqyrton këtë gjë, e cila fillimisht do të kërkonte nga ai që ta shpallte Saipovin “luftëtar të armikut”.
Në një postim në Twitter, presidenti po ashtu tha se beson se Saipov “duhet të dënohet me vdekje”, pasi pas sulmit ka deklaruar se është “i lumtur” dhe ka shprehur besnikëri ndaj grupit militant.
Asnjë i paraburgosur nuk është dënuar në Guantanamo qysh në vitin 2008. Për më tepër, Saipov është banor i ligjshëm i SHBA-së dhe normalisht ka të drejtat ligjore që i janë dhënë me sistemin civil të drejtësisë amerikane.
Por, kryetari i Komitetit të Senatit për Shërbime të Armatosura, John McCain, ishte midis atyre në Kongres që i bënë thirrje Trumpit për ta dërguar Saipovin në Guantanamo.
“Nuk duhet t’i konsiderojmë këto sulme në tokën tonë si të izoluara, por t’i njohim ato ashtu siç janë: akte të luftës”, tha McCain.
Senatori republikan, Lindsey Graham, po ashtu i bëri thirrje Trumpit që ta shpallë Saipovin “luftëtar të armikut”.
Saipov jetonte së bashku me gruan dhe dy fëmijët në New Jersey. Kur u ndalua nga policia, atij iu gjet një dokument i lëshuar në Florida.
Në kompjuterin e tij janë gjetur materiale që lidhen me ISIS. Vrasësi paraqitet si një ‘ujk i vetmuar’ që është radikalizuar në SHBA.
Pas sulmit terrorist, presidenti Trump paralajmëroi se do t’i kërkojë Kongresit t’i japë fund programit të Lotarisë Amerikane për emigracion.
Turmp “fajësoi” këtë program për lejimin e Sayfullo Saipov të hynte në Shtetet e Bashkuara.
“Unë jam duke filluar procesin e ndërprerjes së programit të lotarisë së diversitetit”, tha Trump në një mbledhje të Kabinetit. Unë do t’i kërkoj Kongresit që të fillojë menjëherë punën për të hequr qafe këtë program. Nuk ka qenë diçka e mirë dhe ne jemi kundër”.
Lotaria Amerikane hyri në fuqi në vitin 1995 dhe programi jep çdo vit rreth 50 mijë viza.
