Presidenti i Shteteve të Bashkuara të Amerikës, Donald Trump, e ka përshkruar Stephen Paddock, njeriun i cili vrau 59 persona dhe plagosi më shumë 527 të tjerë në Las Vegas, si një njeri shumë të sëmurë mendor.
Përballë gazetarëve në Shtëpinë e Bardhë, Trump njoftoi se me kalimin e kohës do të rishikojë ligjin e armëve, ligj për të cilin e ka kritikuar ashpër ish-presidentin demokrat Barack Obama në vitin 2012.
Policia është ende në kërkim për të zbuluar motivin që e çoi 64 vjeçarin, Stephen Paddock të hapë zjarr nga kati i 32-të i hotelit “Mandalay Bay” drejt turmës ku gjendeshin disa mijëra njerëz per te ndjekur një koncert.
Forcat e rendit gjetën 23 pushkë automatike në dhomën e 64-vjeçarit i cili vrau veten përpara se të kapej nga policia, 19 armë të tjera zjarri si dhe eksplozivë.
Hetuesit nuk kane gjetur asnjë lidhje mes vrasësit dhe terrorizmit ndërkombëtar, pavarësisht pretendimeve të ISIS se Paddock e kreu sulmin në emër të tij.
Shkaku i vrasjeve masive është ende mister për hetuesit, pasi Paddock nuk kishte pasur asnjë kontakt me forcat e rendit më parë. Ai nuk ishte ndëshkuar asnjëherë nga autoritetet.
E gjitha çfarë dihet për momentin është se bëhet fjalë për një njeri tejet të dhënë pas kumarit. Stephen ishte, sipas të vëllait të tij, një milioner. Në kazinotë e Nevadës, 64-vjeçari njihej si njeri qe harxhonte shuma të mëdha; merrej me investime në pasuri të patundshme në Teksas, ndërsa zotëronte një licencë piloti e dy avionë nje motorësh. Paddock ishte djali i një grabitësi bankash që u arratis nga burgu dhe e kaloi pjesën më të madhe të viteve ‘70 në listën e më të kërkuarve të FBI-së.
