Ekzekutohet në një atentat mafioz në qendër të Elbasanit, avokati i njohur Ravik Gurra.
Ngjarja e rëndë që tronditi jo vetëm qytetin e Elbasanit ndodhi rreth orës 19:35 minuta të kësaj të premte. 50 vjeçari Gurra, së bashku me dy persona të tjerë kishte vetëm pak minuta që ishte ulur jashtë ambienteve të lokalit, kur një person ende i paidentifikuar qëlloi me 3 plumba pistolete ndaj tij, njëri prej të cilëve e kapi në kokë.
Atentatori dyshohet se u ndihmua nga një tjetër person për tu larguar prej andej, me një automjet.
Ndërsa vetëm pak minuta më pas, në fshatin Karakullak, pranë Bradasheshit, u gjet e djegur një makinë tip Benz, që dyshoohet të jetë përdorur në vrasje.
Mjeti i djegur, rezulton të jetë vjedhur në Fushë-Krujë.
Pista kryesore ku janë përqëndruar hetimet, është ajo për shkak të detyrës.
Ravik Gurra me një karrierë të gjatë në profesionin avokat, ka mbrojtur disa nga dosjet të nxehta gjyqësore, në Tiranë, Elbasan e në Vlorë.
Gurra ishte një nga dy avokatët mbrojtës të Emiljano Shullazit, si dhe prej vitesh, avokat e mik i fisit Çapja në Elbasan.
Dëshmitarët në vendngjarje pohuan se autori ishte i maskuar, dhe se nuk dëgjuan asnjë të shtënë arme, duke ngritur dyshimet se pistoleta ishte me silenciator.
Pas vrasjes së rëndë, forca të shumta policie blinduan Elbasanit, ndërsa vijojnë hetimet për identifikimin e autorëve. Në mbështetje të tyre në Elbasan zbarkuan edhe forcat e Repartit RENEA, si dhe ato të FNSH-së nga Tirana.
Për vrasjen e Ravik Gurrës, reagoi edhe Doma e Avokatisë. Duke shprehur shqetësim dhe tronditje për lajmin e kobshëm, kolegët e tij kërkojnë zbardhjen sa më parë të ngjarjes dhe vënien e autorëve para drejtësisë.
