Një sasi lënde plasëse ka shpërthyer në orët e para të mëngjesit në një lokal të vendosur në katin e parë të një pallati në Tiranë, në territorin e Komisariatit nr. 4.
Si pasojë e shpërthimit janë shkaktuar vetëm dëme materiale, ndërsa fatmirësisht nuk raportohet për persona të lënduar.
Sipas dyshimeve paraprake, vendosja e tritolit mund të lidhet me një konflikt të ndodhur më herët, ndërsa grupi hetimor po punon për zbardhjen e plotë të ngjarjes.
Burime bëjnë me dije se pronarët e lokalit nuk kanë dhënë deklarime lidhur me konfliktet e mundshme.
Nga pamjet e kamerave të sigurisë shihet një person që afrohet pranë lokalit, vendos lëndën plasëse dhe më pas largohet në këmbë.
Policia ka sekuestruar kamerat e sigurisë dhe po punon për identifikimin dhe kapjen e autorit.
